巴士乘客送口罩予洗腎母女

Facebook反虎媽俱樂部 Anti-Tiger Mom Club專頁今日刊登了一篇據報是「真人真事」,指有一對無戴口罩往醫院洗臀的母女,如何獲巴士乘客送贈口罩的經過。

「轉載」巴士內,貌似母女的婆婆與中年婦女並肩而坐,沒戴口罩,旁人側目。

終於有乘客忍不住出聲:「外出要戴口罩啊婆婆。」

中年婦女(帶點羞愧地):「唔好意思,我哋買唔到口罩啊。」

其他人:「無口罩就唔好出街啦!」

中年婦女:「唔好意思,唔好意思!我哋有少少事要去醫院。」

眾鼓譟:「嘩,醫院!」(馬上彈開,原本有少少擠逼的車廂原來可以騰出咁多空間。)

中年婦女連忙澄清:「唔好意思,唔好意思!我媽有腎病,我哋去醫院洗腎而已。」

眾暗自透出一口氣,未幾有人說:「你哋咁樣零保護出入醫院唔掂㗎喎,高危㗎。」

有人:「唏,都話買唔到口罩咯!你估人哋想嘅咩?」

有人:「醫院唔派嘅咩?」

有人:「邊有?醫護都唔夠!」

巴士內頓時你一言我一語,成個城市論壇咁。

粗眉大眼市井阿叔造型大肚腩中年男子從隨身包包中掏出用密實袋包裝的口罩乙個,豪氣干雲:「我預多了一個一陣夜更替換,送你!」

中年婦女滿面通紅答謝,接過。

另有手挽買餸籃師奶也掏出一個:「你媽有,你也要一個,否則是但一個感染都唔掂。」

又有好事之徒問:「你阿媽每星期要洗幾多次腎㗎?」

中年婦女差不多是歉意地回答:「三次。」

「那怎麼夠?」「口罩供應我看二月底才能穩定。」「穩定也不是人人買到!」「阿婆唔識上網睇口罩消息㗎喎。」「這幾個星期點捱?」「唉!」

「都話家中如有超過一星期供應嘅口罩就送一個俾有需要嘅人咯。」

一人攞一個出來,一人攞一個出來,一人攞一個出來……好快,中年婦女手上已堆滿十來個口罩。

中年婦女(熱淚盈眶):「夠了,夠了,多謝大家,多謝大家!」

眾七嘴八舌:「客咩氣?」「我用少一個唔使死!」「你需要多啲!」「唉,自私無用,一日仲有人有事,一日未安全!」「香港人,守望相助。」「自己香港自己救!」

有一把聲,好鬼大,人人蒙面,不知是誰講的:「我話你知,香港人,無事無幹時利欲薰心,一有事,全世界最有義氣!所以我話你知,香港一定唔會死!」

市井阿叔:「X!香港梗係唔會死,我同你哋講,我哋大家都~唔~X~准~死!」

Written by

A columnist in political development in Greater China region, technology and gadgets, media industry, parenting and other interesting topics.

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store