傳媒高層食死貓?

香港傳媒高層到北京朝聖,其後有代表向電子傳媒現場直播講解朝聖時所下的「聖旨」,豈料所有直播及即時新聞出街後,據報有人感到不高興而要求所有媒體撤回報道。這一事件相信必會成為新聞系及公共關係科的教材,皆因在即時新聞時代,重要人物的任何面對鏡頭的講話都必然會立即被報道被瘋傳,也會立即成為人家的談論話題。若然自己都未CHECK清楚人家講什麼便立即引述,這不要怪誰, 只能怪自己了。

當然, 今次事件可從兩個角度去分析, 第一, 就係發言人首輪發言講錯咗, 之後用文字版來補鑊, 完全係自己發現無外力干涉, 第二就係一如目前傳聞, 有官方人士睇完發覺引述錯誤, 向朝聖團發出白紙黑字的澄清文本, 要求各媒體統一口徑報道。如果係第二個情況, 其實都不難理解, 因為你去朝人地既聖, 但又講錯人地既嘢, 咁主人家唔高興自然要求澄清, 這對任何公關人員來講都正常不過。

之不過, 由於今次既朝聖團並非商業活動, 而是一次具有政治意義及目的既安排,任何前言不對後語既舉動,都會引來不同界別人士包括傳媒學者及民主派既窮追猛打。睇番發言人兩次版本既引述, 其實意義係完全不同, 第一個出街版本係叫香港傳媒唔好成為干擾中國政治既基地, 第二個說法就係要防止外部勢力把香港變成對中國進行干預破壞的基地。作為局外人, 呢兩句嘢無論發音同語句都係完全唔同, 第二句亦比第一句多咗四個字, 就係外部勢力。咁成團人係無人聽得明普通話搞出今次事故, 定係真係有人在報道出街後覺得講大咗而要求澄清呢?

對北京嚟講, 第一個版本係直接明確既指令, 有講過係唔出奇的, 但一如某啲報道講, 呢啲嘢唔可以出街的, 但有人心直口快講咗出嚟, 做壞咗規矩, 要阿爺出嚟收拾殘局。第二個版本係一直既發言方向, 無甚特別, 因此成為澄清版的文字。

今次呢個團唔止發言人一個, 大家都經驗豐富唔會亂UP, 如果大家係真正既新聞工作者, 就必須為自己既公信力做一啲嘢, 就係所有在場人士出嚟澄清呢兩句嘢邊句先喺會上有講過既, 最好係攞埋筆記出嚟核對, 有無外部勢力同香港傳媒呢八個字, 以此來推論誰是誰非。現在發言人的澄清, 無助解開北京干預的說法, 作為傳媒人如果係做錯了, 引述錯了, 就要道歉, 如果被撤回的一句係有講過, 亦必須澄清, 北京要干預係人都知, 佢地都唔介意做醜人, 你班傳媒高層又做咩咁驚? 你地都搵够上岸啦, 係咪?

Written by

A columnist in political development in Greater China region, technology and gadgets, media industry, parenting and other interesting topics.

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store